 |
| جروس |
كنا متضايقين من ان الفرص بتيجي و بتضيع .. دلوقتي الوضع اتغير و وصل بينا الحال إننا مبنصنعش فرص أصلا !
تعادل صعب الأمور علينا و جعل الفريق يضع قدم و نصف خارج البطولة و لكن هناك نصف قدم مازالت متشبثة بمعجزة .
- دة أسوأ لقاء للزمالك منذ لقاء النجوم في الدوري بالدور الاول .. لم أري زمالك جروس بائس و فقير فنيا و بدنيا مثل الأمس و حتي علي صعيد التحضير النفسي و الذهني اللي كان بيميزنا قبل اللقاءات الهامة .. من بداية اللقاء و تمريرات خاطئة بالجملة ، لعب عشوائي و اعتماد كلي علي الفرديات و مساحات شاسعة بين اللاعبين .. خط الوسط منعزل تماما عن خط الهجوم و المدافعين هناك مساحات كبيرة بينهم خاصة بين كل مدافع و الظهير اللي جنبه .
- يمكن بالأمس فعلا الزمالك واجه اول اختبار صعب في أفريقيا هذا العام .. فريق منظم بيلعب كرة علي الأرض بشكل كويس وواضح انه مذاكرنا بشكل جيد جدا و أغلق جميع النوافذ و المساحات علينا و كان بيلعب علي الظهيرين بتوعنا ، عبدالله جمعة دفاعيا و منع انطلاقات النجاز هجوميًا و الضغط الكبير علي فرجاني بلاعبين فا أفقد الزمالك خطورته تماما.
- حتي الطريقة اللي كان بيعملها جروس لهروب فرجاني من الرقابة فشلت بالأمس لسوء حالة الرباعي الأمامي بالكامل .
- الشوط الثاني لم تتحسن الأوضاع كثيرا و لم تسنح لنا الا فرصة واحدة اهدرها بوطيب اللي تم استهلاكه بدنيا بنزوله للعب علي الأطراف و عمق الملعب بدلًا من بقاءه داخل منطقة الجزاء و توفير مجهوده للجزء الأخير من الملعب أمام المرمي فا ظهر بشكل بائس عاجز غير قادر علي فعل أي شيء.
- جروس علي غير العادة أجري ال3 تغييرات لاء و أجراهم بشكل مبكر و كأنه بيحاول يصحح أخطاءه السابقة و لكن في الوقت الخطأ !
- نزول عمر السعيد كلاعب قوي علي الأطراف يضم علي إلي العمق كهاجم ثاني في استنساخ فكرة ماندزوكيتش في اليوفي و دي عملها جروس في أكثر من لقاء سابق ثم نزول حفني لتخفيف الضغط علي فرجاني و تحريره من الرقابة ووجود لاعب اخر يجيد التمريرات البينية في عمق المنافس ، التغيير الأخير تغيير موجه لإدارة الزمالك حميد أحداد مهاجم صريح ولا شيء غير ذلك لعبه علي الأطراف او تحت رأس الحربة فكرة فاشلة تماما لإن اللاعب لا يملك مقوماتها و كان غريب جدا الابقاء عليه في يناير بالرغم من عدم الاستعانة به في مركزه الرئيسي و عدم استفادة الفريق منه الا لدقائق قليلة .. عارفين ليه حميد أحداد بقي في الزمالك ؟ لفشل ادارة النادي في توفير البديل و فشل المفاوضات مع أكثر من لاعب أجنبي !
- جروس طلب لاعب يجيد اللعب كا مهاجم وهمي و علي الأطراف ليكون مختلف عن بوطيب و عمر السعيد و لكن إدارة النادي لم تفعل شيئا !
- تعادل مُخيب و لكن بالنظر لأداء الفريق في الملعب فا نقطة بطعم المكسب بصراحة .. انا مبحبش الأحلام او اني اشتغل نفسي و أشتغل الناس بسيناريوهات شبه مستحيلة .. زمالك بداية الموسم و حتي نهاية يناير يقدر يفوز في اللقاءات المقبلة بكل سهولة و يتأهل بكل أريحية ، زمالك فبراير يُعتبر خرج خلاص من الكونفدرالية .. أي زمالك هنشوفه في اللقاءات المقبلة الحقيقة مش عارف .
خلصنا كلام عن اللقاء عندي كلام عايز أقوله خارج اللقاء
- عبد الله جمعة بيقدم أقصي ما عنده و أقصي امكانياته و مبيبخلش عن الفريق بشيء و لكن سوءه الدفاعي لا يتحمله إلا إدارة النادي .. هي دي امكانياته يا جماعة و دة اخره في المركز دة الراجل مش متخاذل ولا بيتدلع ولا حاجة بالعكس بيموت نفسه فعلا بس امكانياته الدفاعية ضعيفة للغاية ! هتقولولي البديل هقولكم بهاء مجدي دة من أسوأ أظهرة الدوري و عبدالله أفضل منه حتي بسوءه الدفاعي افضل منه .. الكلام لازم يبقي موجه لإدارة النادي أولًا ثم للمدرب اللي ممكن يغير الخطة لمعالجة الثغرة اللي كل الأهداف اللي سكنت شباكنا بقالنا شهرين كان منها !
- إدارة النادي عشان تجامل نادي تاني و و تدخل معركة مالهاش لنا ناقة ولا جمل وافقت تلعب لقاء المقاصة بعد دقائق فقط من رفضها اللعب !! بأي عقل نقول ان الفريق يلعب الأربعاء لقاء مصيري بالكأس و عنده بعدها ب 3 أيام لقاء في أنجولا !! بأي عقل يعني و عشان خاطر إيه و مين و احنا مصلحتنا إيه من كدة !!! رئيس النادي بيجر الفريق لمعركة مالناش علاقة بيها و بندفع تمنها ارهاق و تعب و استنزاف لطاقات اللاعبين.
- الفريق في دروب واضح و حالة من الابتعاد عن المستوي طبعا واردة و بتحصل لكل الاندية في العالم و لكنها طولت شوية معانا و للأسف مفيش وقت للتدارك ، اللاعبين دول هما هما اللي كنا طايرين بيهم و بنشكر في معظمهم و بنتغني بيهم من شهر بس وهو هو نفس المدرب اللي شايلينه علي الأعناق و طايرين بيه من بداية الموسم و لحد نهاية يناير فقط مش معقول ننسف كل دة و نهد كل دة و الفكرة ان مفيش حاجة هتتغير .. يعني لا هنعرف نغير اللاعبين او نجيب غيرهم ولا في مدرب كبير متاح هيجيلنا حاليًا .
- جروس عنده مشكلة في إدارة اللقاءات خاصة لو السيناريو اللي مخططله اتغير او متمش تنفيذه مثلما كان متوقع او زي ماهو عايز .. تحسه بيعطل او بيهنج مش عارف بس بحسه مبيتحركش لتغيير الأوضاع بشكل حاسم يعني.
- جروس مدرب كبير ؟ اه مدرب كبير .. عنده أخطاء ؟ اه عنده أخطاء .. مساهم في مشكلتنا الحالية اه طبعًا مساهم .. لكن هو المسئول الوحيد و الأكبر عن مشاكل الفريق الحالية ؟ لاء و ألف لا
- الفترة الحالية كلامي موجه للاعبين هما أكتر ناس هيحسوا بالجمهور و بالمسئولية اللي عليهم و أكتر ناس أكيد نفسهم يحققوا انجاز لنفسهم حتي قبل النادي.. والله والله والله كل تعبكم اللي فات و كل اللي وصلتوله ممكن يروح في ثواني بشوية تراخي او دلع .. احنا لسه مكسبناش أي شيء ولا حققنا اي حاجة و لكن في نفس الوقت احنا مخسرناش اي حاجة و كل البطولات احنا مسئولين فيها عن نفسنا و الأمور احنا المتحكمين فيها بنسبة 100%
تعليقات
إرسال تعليق