الزمالك يفقد
الصدارة مرة أخري و يخسر من قاهر الكبار بيراميدز بهدف نظيف.- خسارة طبعاً مستحقة
و حتي التعادل مكناش نستحقه هتكلم بشكل مُفصل كالعادة عن اللي حصل النهاردة في
واحدة من أسوأ لقاءات الزمالك فنياً هذا الموسم.
- الفريقين بدأوا اللقاء بنفس خطة اللعب تقريباً 4/1/4/1
الزمالك
جنش
جمعة - الونش -
علاء - النجازطارقزيزو - اوباما - هيما - حسنعمر السعيد
بيراميدز
الشناويعمر - جبر -
الميداني - بكاردونجاكينو - السعيد - تراوري - فاروقخربين-
معجبنيش تشكيل
الزمالك خالص و تحديداً البدأ بالونش و إبقاء كهربا علي مقاعد البدلاء .. الونش
مدافع كارثي أمام اي مهاجم حريف او ذكي ، كارثي بمعني الكلمة لا بيتمركز صح و سهل
يترقص لأنه مندفع و سهل تستدرجه و تخرجه من مكانه
..
الونش يلعب فقط في
المباريات اللي فيها صراعات بدنية أو كرات طولية من الخصم وهو اللي مش متوافر في
بيراميدز ومش لاقي سبب لإبقاء محمد عبدالغني أفضل مدافع في الفريق دايما علي مقاعد
البدلاء خاصة و انه مميز كمان في بناء اللعب و المساهمة في الخروج بالكرة و كلها حاجات
معدومة في الونش!!-
اما كهربا فا بكل
عيوبه هو أخطر لاعب في الفريق شئنا ام ابينا هو اخطر و اهم لاعب هجومي في الفريق
.. كهربا مش هيديك كورة لو نزل كا بديل هو طبيعته كدة مش هتاخد منه حاجة او مش
هتستفيد منه زي ما بيلعب أساسي .. مش عارف اصلا قعد ليه و اديت احساس للخصم انك
نازل تدافع و تقفل و انت مستغني عن كل أوراقك الهجومية .- الكابتن زيزو عشوائي ..
جري بلا فائدة او طائل دون أي مساهمة او شيء عليه القيمة و طبعاً ابراهيم حسن لا
تعليق عليه.
- من بداية اللقاء و لاعبي الزمالك نازلين مشحونين بشكل مبالغ فيه و متوترين
و متعصبين مش عارف ليه .. في فرق كبير بين التحفيز و الشحن .. نازلين متوترين و
متنشنين تماماً في المقابل هدوء أعصاب كبيرو برود يحسدوا عليه من لاعبي بيراميدز
ساعدهم علي تمركزهم الصحيح الدائم في الملعب و حُسن انتشارهم.- لاعبي بيراميدز
كانوا منتشرين بشكل ممتاز و خطوطهم متقاربة بيسلموا و يستلموا بسهولة و هدوء و
بالتالي مكانوش بيبذلوا جهد كبير علي عكس لاعبي الزمالك اللي كانوا بيجروا دايما
ورا الكرة فا بيخرجوا كتير من أماكنهم وبالتالي بتتخلق مساحات في نصف ملعب الزمالك
كان بيستفيد منها عبدالله السعيد في كرات بينية سواء طولية او أرضية للأطراف و كنا
بنشوف دايما طرفين بيراميدز سواء كينو او فاروق دايما في موقف واحد علي واحد علي
باكين الزمالك.- بالرغم من قلة محاولات بيراميدز و لكن كنت تشعر فيهم بالرغبة أكثر
وانهم نازلين للفوز و كنت تشعر بخطورة هجماتهم خاصة مع بعض المساحات اللي توفرت في
عمق وسط الملعب نتيجة ترك طارق حامد وحيداً في مواجهة افضل لاعب بالكرة المصرية
حالياً عبدالله السعيد .
- جروس أعطي تعليمات لأوباما بالنزول بشكل أكبر بجانب طارق حامد اللي خد
انذار و كان بيلعب بتهور و سذاجة ليساعده دفاعياً و يغلق العمق .
- محاولات بيراميدز كنت تشتم فيها رائحة الخطورة مقابل عشوائية و بالبلدي
كدة حنكشة من الزمالك مع تألق من محمد ابراهيم أفضل لاعب بالزمالك و الوحيد اللي
أجاد فعلاً و مكانش خايف ولا متوتر و بيلعب بثقة و محاولات فردية منه لم نستفد
منها لإنعدام المساندة الهجومية معه .. ايد لوحدها متسقفش و يعني يوم ما محمد
ابراهيم يلعب ماتش حلو الفرقة كلها متجيش الماتش !!
- بيراميدز تقدم بهدف من ركنية و طبعاً كان معروف و متوقع ان لاعب سابق
للزمالك هيسجل و فعلها علي جبر اللي لعب من الزمالك 600 ماتش ب 5000 ركنية مسجلش
فيها ولا هدف !! بسوء رقابة غريب من النجاز اللي من بداية المباراة وهو خايف من
كينو و قلقان و كل تمريراته غلط سواء للخصم او في الاوت تحس ان ركبه بتخبط في بعض
و دة شيء غريب للاعب دولي كبير زي النجاز!
- طبعاً الركنية اللي جيه منها الهدف مش ركنية أصلا و الكرة مخرجتش علي الإطلاق
ولا خرج أي جزء منها !!
- بعد الركنية تحصل علي بيراميدز علي ركلة جزاء مضحكة انا لحد دلوقتي مش
عارف هي علي مين وليه ولا فاهم اتحسبت ازاي حتي :اتفلسف فيها خربين وواضح انه
مبيتفرجش علي جنش في ركلات الترجيح ولا توقع ان جنش يكون شاف ركلاته سواء في
الهلال او منذ قدومه إلي بيراميدز فا ضاعت .
- بعد الهدف الزمالك حاول يبادر الهجوم لكن بعشوائية .. همبكة و خلاص . كرات
طولية ، فقدان للكرة في الثلث الأخير بسهولة .. انعدام الزيادة العددية الهجومية
بجانب تقهقر دفاع بيراميز للخلف و كانوا منظمين بشكل ممتاز علي خلاف لقاء الأهلي
يمكن ساعدهم علي دة غياب ثغرتهم الكبري أحمد أيمن منصور و البدأ ب علي جبر ثم ضعف
العدد الهجومي للاعبي الزمالك و قلة الضغط حتي عليهم .
- اعتمدنا علي الكرات الثابتة و من احداها كانت هناك ركلة جزاء صحيح لم
تُحتسب و شيء غريب ان اللي حسب ركلة جزاء بيراميدز اللي كانت بالشكل دة يرفض يحسب
ركلة جزاء زي دي !!- الشوط التاني الزمالك بدأ بتغيير بنزول كهربا و خروج العشوائي
و تحول الاعتماد في الهجمات علي فرديات كهربا و اجتهادات عبدالله جمعة .. صحيح حصل
بعض الحركة و لكن مفيش حاجة أقدر أقول عليها خطيرة او فرصة محققة مثلاً .
- لعب عشوائي من الزمالك ، كرات طولية .. خسارة كل الكرات الثانية نتيجة سوء
الانتشار و التمركز .. أي كرة مرتدة من دفاع بيراميدز لازم تلاقي لاعب من بيراميدز
هو اللي هياخدها في مقابل مسافات بعيدة بين خطوط الزمالك و لاعبيه و دة خلي في
مجهود مضاعف في استعادة الكرة و كان مريح لاعب يبيراميدز في التسليم و الاستلام و
اللعب من لمسة واحدة في مساحات ضيقة ما الضغط عليهم ضعيف !!
- شوط تاني هو شوط عبدالله السعيد .. عمل فيه كل شيء الحقيقة .. ترمومتر
تحكم في كل هجمات بيراميدز و تحرك دائما في الفراغات و بين الخطوط و عارف امتي
يهدي الريتم و امتي ياخد فاول و امتي يمرر و يمرر لمين .. في الشوط الثان تحديداً
تفوق بإكتساح علي طارق حامد اللي خرج نفسه برة جو اللقاء مبكراً بالإنذار المبكر و
العصبية الزائدة و الضرب بلا مبرر و الحكم تساهل معاه الحقيقة في عدم طرده و
اكماله اللقاء للنهاية.- الحقيقة شوط تاني مفيهوش حاجة من الزمالك بالرغم من
التغييرات و كلها مركز بمركز و تحول طريقة اللعب في اخر 15 دقيقة إلي 4/2/4 في
المقابل بيراميدز قدم شوط دفاعي مميز سواء في التنظيم او غلق العمق بتمركز ممتاز
من دونجا ثم بعد اشراك فتحي لتتحول الخطة إلي 4/2/3/1 .
- الحكم كان متواضع و سيء جداً من وجهة نظري و لكن انا مش هحمله الخسارة
لإننا فعلاً ملعبناش كورة .. معملناش أي شيء يستحق عليه التعادل حتي .. ولا هجمة
ولا هجمة لأقوي خط هجوم بالدوري .. ولا فرصة حتي !! اقول حكم اللي خسرني لما أضيع
10 12 فرصة مثلاً و ابقي مقطع الخصم لكن احنا مجيناش الماتش اساسا فا مش هعلق
الخسارة علي شماعة الحكم بالرغم من اعترافي انه متواضع و ان الزمالك في ماتشين
بيراميدز تأثر بالسلب من حكمي اللقاء.- لاعبيتنا خفيفة ذهنياً .. سهل يخرجوا من
تركيزهم و يتعصبوا و يتوتروا .. وارد تلاقي حكام سيئة و اي عوامل مؤثرة لكن
المفروض انك تبقي ذكي و تعرف تتعامل مع كل الظروف و تمسك نفسك .. وتروا نفسهم بلا
داعي و خرجوا برة موود اللقاء.- أخيراً في فروقات فنية كبيرة بين الفريقين مش
عايزين نضحك علي نفسنا .. هما أفضل فعلاً علي الأقل فردياً .. قايمتنا فقيرة يا
جماعة والله .. الأهلي و بيراميدز دعموا صفوفهم تدعيم جنوني في يناير و دة حقهم و
هما صح .. انت قعدت تتفرج و اشتغلت نفسك و مشيت ورا كلام مصاطب التحليل و
المطبلاتية عشان تبقي قايمة الزمالك تتساب بالضعف الفني دة!! و دي مسئولية ادارة
فقط لاغير.أخيراً الدوري لا خلص ولا انتهي نقفل صفحته مؤقتاً قبل معركة
الكونفدرالية و أرجو أرجو العمل علي تأجيل لقاء الإنتاج بأي طريقة لما بعد لقائي
النجم.- خير يا جماعة لسه بدري و مازال كل شيء بأيدينا و مازال كل شيء قابل
للتدارك .. في 4 أيام فقط الصدارة اتنقلت ل 3 أندية و لسه هتتغير تاني .. انت
معتمد علي نفسك فقط لا نتايج الغير ولا حاجة .. بيراميدز سابقك بماتشين و لسه في
مواجهة مباشرة مع الأهلي
تعليقات
إرسال تعليق