يد الزمالك تحقق انتصار غالي جدا علي الاهلي بنتيجة 22/20 في ختام المرحلة التمهيدية لدوري المحترفين
الحقيقة لو هتكلم فنيا الماتش كان متوسط المستوي عكس اغلب التوقعات ومكنش في ندية كبيرة وكنت حاسس إن الاهلي داخل خسران نفسيا قبل بداية المباراة و أخد الزمالك الأسبقية في النتيجة من اول الماتش لاخره
الزمالك عمل شوط اول عظيم دفاعيا ماشفتوش من فترة طويلة بتركيز و ثبات من هتلر ويحيي الدرع واحمد حسام اللي قفلوا تماما الاختراقات للخط الخلفي للاهلي رغم محاولات ليندجرين المدرب السويدي للاهلي اللي عمل اكتر من تغيير بين عبد الرحمن فيصل ويوسف معرف او بين باهر البدراوي وممدوح طه وحاول في الاخر بنزول احمد خيري جنب اسلام حسن لكن دفاع الزمالك كان قافل كل حاجة ب Foot work ممتاز وتحرك عرضي وخروج لمقابلة لاعبي الاهلي بره خط ال 6 متر ومع تألق كمان للحارس محمد علي قدر الزمالك يتقدم بسهولة مع وجود الحلول الهجومية للفريق متمثلة في الاحمر والدرع ونجم الشوط مصطفي خليل اللي سجل 3 اهداف وانتهي الشوط بتقدم الزمالك 9/5
شاهد أيضا:
بعثة الزمالك تشتكي مازيمبي لـ "الكاف"
في الشوط التاني الوضع مااتغيرش كتير واضطر مدرب الاهلي لتغيير الحارس عصام الطيار الغير موفق تماما النهارده ورغم محاولات الاهلي لتقليص النتيجة لكن كلمة السر كانت يحيي الدرع اللي خلص اكتر من هجمة بمهارة فردية خالصة ومن تسديدات صعبة جدا وده عمل احباط كبير لفريق الأهلي وحافظ الزمالك علي تقدمه للنهاية
الزمالك النهارده اتأثر بغياب وسام نوار علي الدايرة واعتمد باسم السبكي علي قوة الخط الخلفي للفريق
الزمالك قطع شوط كبير في طريق الحفاظ علي لقبه كبطل للدوري لانه نجح في الصعود للمرحلة النهائية بالعلامة الكاملة بعد ما قدر يفوز علي ال 7 فرق اللي صعدت معاه ولن تكون هزيمته الوحيدة من الجزيرة مؤثرة لعدم صعود الجزيرة
شاهد أيضا:
القنوات الناقلة لمباراة الزمالك ومازيمبي / ومعلق المبارة
اما الاهلي تلقي هزيمته الثانية بعد هزيمته من هليوبوليس يعني هيدخل المرحلة النهائية متأخر بفارق 4 نقاط كاملة عن الزمالك
الدوري هيتوقف الفترة الجاية بسبب استعداد المنتخب لامم افريقيا في تونس شهر يناير وهتبدأ المرحلة النهائية إن شاء الله في شهر فبراير بين ال 8 فرق بنظام دوري من دور واحد ويضاف اليها نتائج ال 8 فرق مع بعض في المرحلة التمهيدية
الف مبروك لكوماندوز اليد بالزمالك وجمهور الزمالك وبالتوفيق في باقي المشوار إن شاء الله
تعليقات
إرسال تعليق