اخبار الزمالك اليوم/ غموض في موقف طارق حامد من المشاركة في مباراة مازيمبي

كريستيان جروس

استحملوني في الكلام المطول و المفصل دة و لكن هحاول اطلع كل اللي عايز اقوله مرة واحدة.

- الزمالك فقد نقطتين ثمينتين و سهلتين امام فريق انا شايفه متواضع زي طلائع الجيش.

- الفريق في دروب واضح في مستوي لاعيبته و مدربه .. و الدروب مش بدني لإني مش مقتنع ان الفريق مرهق بدنيًا و إلا مكناش هنضيع 3 انفرادات بالمرمي في اخر 4 دقائق من اللقاء و نهاجم بالكثافة دي.

- جروس بيتحمل جزء كبير من تعثر امبارح .. ليه ؟

لنفس الأخطاء الماضية واللي بنتكلم فيها كل ماتش تقريبا وفي كل تحليل حتي لما بنكسب.. جروس من مدرسة انك تهاجم تهاجم و تبعد الفرق عن دفاعك " تحمي نفسك بالهجوم يعني " و دي مدرسة كان بيطبقها كلوب الموسم الماضي في ظل عدم وجود حارس مرمي قوي ولا دفاع قوي مثل فان دايك و أليسون بيكر الأن.

و لكن

انت احيانا الهجوم مبيبقاش موفق و الفريق مبيقدرش يلعب بنفس الريتم 90 دقيقة و دة طبيعي الكيرف ينزل احيانا في اوقات اللقاء مش عيب ابدا ابدا ابدا تدافع و تقفل و تحافظ علي مرماك و تركن الباص زي ما بنقول "Park The Bus " واضح في عدم توفيق احيانا و رعونة و استهتار احيان كثيرة اخري من بعض اللاعبين فا مالوش لزوم العند و تدافع طالما الهجوم مش جايب نتيجة او محسمش شيء!

- مارتن لاسارتي مدرب الأهلي انا شايفه مدرب متوسط و لكن الراجل واقعي في كل لقاء و بعد التقدم بينزل الشوط الثاني بيدافع و يقفل الملعب صحيح هو بيدافع من بدري و بيدي فرصة للفريق الخصم يدخل أحداث اللقاء و دة أحد عيوبه وانا مش عايز جروس يعمل كدة و لكن الراجل دة تفكيره انه يسجل و يأمن و يدافع " مش معني كدة ان لاسارتي افضل من جروس او بقول يعمل زيه " عشان الناس تفهم كلامي صح .. اللي بقوله طالما الهجوم استمر و مفيش نتيجة و مفيش قتل للقاء يبقي تيجي في اخر ربع ساعة ومش عيب تدافع فيهم و تلعب مرتدات و تستغل اندفاع الخصم .. امبارح احنا بندافع الشوط الثاني و في مساحات شاسعة في وسط ملعبنا و دفاعنا و كل الطرق مفتوحة والهدف قبل ما ييجي جالنا تحذير من تسديدة لأحمد سمير خرجت بجانب القائم.

- المشكلة الأولي دي مستمرة معانا و بنتقد فيها جروس دائما .. المشكلة الثانية هي وصول شعور لبعض اللاعبين المتخاذلين ان مكانهم مضمون مهما حصل و مكانهم لن يُمس مهما حصل و بالتالي اللاعب مبيموتش نفسه علي مكانه منا كدة كدة هلعب .. سددت بوش رجلي الداخلي ولا الخارجي ولا بقفايا حتي انا موجود اساسي الماتش الجاي لاء و المصيبة انهم مبيتغيروش او بيتبدلوا و ينزل حد تاني و دي يتسأل عليها جروس اللي بإختياراته و تصرفاته وصل الإحساس دة لبعض المتخاذلين ، هتقولي مفيش بديل هقولك مش مهم و ايا كان البديل هينزل جعان كورة و عايز يلعب علي الأقل مش هيتخاذل ولا "هيتمرقع " لحد ما الأساسي يتربي!

- دول النقطتين اللي بحمل فيهم المسئولية لجروس فقط .. نييجي نتكلم عن اللاعبين قبل كلامي عن الجمهور.

- لاعيبة الزمالك مدركة انهم متصدرين ل 22 أسبوع ؟ مدركين ان اللي فاضل أقل بكتير من اللي فات و لكن أخطر و أهم؟؟ مدركين ان كل التعب و المجهود و الأرقام و الأداء و كل الحاجات الجميلة دي ممكن تروح فجأة ولا حد هيفتكرها حتي بعدين ؟!

انا حاسس بإهمال بصراحة او عدم تحمل مسئولية او راحة مش عارف اوصفها ازاي اكيد انتوا فاهمين قصدي و لكن في لقطات بسيطة كدة ظهر فيها الكلام دة .. الهدف الثاني بدايته كانت ركنية للزمالك شيء غريب الحقيقة ان الدقيقة 88 و نلاقي الكم دة من اللاعبين داخل منطقة جزاء الخصم منهم قلبين الدفاع !! في اي مكان في العالم الركنية في الوقت دة لو لفريق كسبان بيروح لاعب علي الكرنر و تتعمل قصيرة و يضيع وقت بيها او يكسب رمية تماس او ركنية جديدة !! مش بس كدة محدش فكر يعطل الهجمة من بدري بخطأ تكتيكي حتي لو كلفه طرد مش بس كدة النجاز قطع الكرة عشان تترد قدام 3 لاعبين من الزمالك التلاتة بيتعازموا علي بعض قدام منطقة جزائنا في الدقيقة 89 مين يشتتها ؟!! ما تشيل الكرة بزميلك حتي لو تطلب الأمر او لو هتشيل الخصم حتي و تعمل فاول و لكن أهون من تركها بالمنظر دة !

- سيل من الفرص الضائعة بشكل متكرر في جميع اللقاءات في حاجات فيه مينفعش احملها للمدرب يعني في فرص معينة بتضيع بأسلوب غريب مالهاش علاقة بتدريب مدرب للاعبين علي الفينيش .. دي مشكلة في اللاعب اللي بيضيعها نفسه.

- بالنسبة لأوباما او المتخاذل و دة رأيي فيه .. بالنسبالي هو لاعب لقطة .. لقطة بمعني هو كادر واحد يظهر فيه يقعد علي حسه شوية و الباقي مش موجود ، لا يعتمد عليه ابدا ولا هيكون شيء كبير .. عقلية صغيرة للغاية تفكيرك في الكليب او لقطة اليوتيوب اللي هتتعمل و الGIF اللي هتتصيت به علي حساب مستقبل النادي و احلام جماهيره و الحقيقة كلامي مش بس عشان لقطة امبارح لأ دة العادي بتاع أوباما في كل لقاء تقريبا .. اللقاء اللي فات علي سبيل المثال علي انبي بيرقص داخل ال18 امام مرمانا في الدقيقة 93 و عدت و ربنا سترها و حتي مرضيتش اتكلم عن في تحليل اللقاء و قولت صدفة معلش و خلاص لكن مفيش فايدة !

- أخيراً كلام لجمهور الزمالك اللي بتشرف اني واحد منهم انا عمري ما حجرت علي رأي حد ولا وجهت الناس و أجبرتها علي رأي معين و متفهم ان الناس عايزة تتنفس عن غضبها و حزنها و لكن .. ليه الإنهزامية دي يا جماعة !! ليه الإحباط دة و تصدير اليأس و الخسارة لينا و للاعبين بالشكل دة !! الفارق كان 6 وصل ل 4 و حتي لو وصل ل 2 او تصدرنا بالتساوي ما كل دة وارد .. منكملش الدوري يعني ولا نسيب باقي الماتشات ولا نعمل ايه طيب و هتلاقي اللي بيقول خسرنا الدوري بيشجع مثلا ليفربول ولا السيتي ولا الريال و مقتنع ان فريقه من التلاتة دول هيكسب الدوري مع ان ولا فريق من دول موقفه أحسن في دوريه من الزمالك حاليا.

لسه بدري يا جماعة والله لسه بدري و بلاش انهزامية و تشاؤم .. عاجبني بصراحة كلام مسئولين الأهلي اللي كانوا في المركز الأخير و خسارة من المقاولون في نوفمبر الماضي و مقتنعين تماما انهم هيكسبوا الدوري و في كل تصريح ليهم اعلاميا مقتنعين انهم اول الدوري و بطل الدوري واحنا اللي متصدرين الدوري من بدايته و بفارق 4 نقاط يعني تعثر ماتشين من أقرب منافس شايفين ان الدوري خلص و خسرناه !!.. نفسي نبقي بالعقلية دي و مش عيب لما نلاقي حاجة كويسة في المنافس ابقي عايز نبقي زيها.

- تفائلوا بالخير تجدوه .. خير ان شاء الله و الدروب بيحصل لكل فرق العالم مفيش فريق بيفضل يكسب و يقدم مستوي جيد دايما لازم في وقت سلبي بيحصل في تعثر للفريق الوقت دة حصل لكل أندية العالم .. السيتي في ديسمبر حصله دروب وصل بيه الفارق مع ليفربول إلي 7 نقاط .. برشلونة حصله دروب في فبراير و امثلة تانية عديدة .. نخلينا ورا الفريق زي عادتنا في النتائج السلبية دة أكتر وقت الفريق محتاجنا فيه.